Skip to content

Lalwa bouch mwen pa pou vann

Yon semèn aprè m te kòmanse ak koze “lalwa bouch mwen” an, majòjon yon jounal ki sòti chak jou rele m pou l fè m “yon pwopozisyon ki t apral choke m”: pou m ta pibliye biyè m yo nan jounal li a, men fò m dakò se li ki pou pibliye yo an premye.

De (2) jou apre, se te kou pa mèt yon jounal ki sòti chak semèn pou li mande m pou m travay ak yo men sa ki enterese yo se biyè m yo. Mwen bay tou de (2) sanse menm repons lan : mwen remèsye nou pou pwopozisyon an epitou poutèt nou enterese a biyè m yo, men biyè m yo p ap fè yon pa kita yon pa nago.

Depi lè sa a, m pa ka konte, sitèlman mwen jwenn òf pou BLÒG la. Gen ladan yo ki kareman rizib. M fè anpil efò pou m bliye si gen moun m pa menm konnen k ap dim pou m travay ak yo, pati politik k ap dim pou m vin manm oswa pou m vin kandida san yo pa janm di m kandida nan kisa.

Se yon siyal klè kou dlo kòk ki fè m konprann nou antre nan peryòd prepolitik la, lè yo kwè yon sitwayèn ki ekri kèk biyè paske l about ka « bay modòd » yon revolisyon.

Sa nou dwe konnen : kote nou ye a se la n ap rete, se sou rezo sosyal yo m pi alèz. Youn nan sijè m plis renmen travay sou li se medya patisipatif ak politik. Se pi bon mwayen pou m teste kèk teyori m genyen. M prefere gad kot sa ap mennen m, san m pa twò bezwen konnen ki wout l ap pran. Bay priyorite ak yon lòt kanal p ap bon pou esperyans lan.

Men yon lòt rezon ki fè m ap kontinye refize òf sa yo. Paske sou rezo sosyal yo, m pa gen ni patwon ni delè pou m respekte. M pibliye sa m vle, lè m vle. San yo pa ban m digèt. BLÒG sa se yon distraksyon, se pa yon obligasyon. M ta renmenm li rete konsa. Transfòme l pou l parèt chak tan nan yon jounal riske chanje sa.

Konsa, pou fini ak bagay sa m ap kite pou moun k ap fè demann sa yo, yon ti « dizon » ki gen twa (3) atik:

  1. Biyè yo se pou nou li ye. Nou ka sèvi ak yo lè nou vle, kote nou vle ak jan nou vle, sèlman di kote nou pran biyè yo, di se mwen ki manman yo.
  2. Sa m pale yo, se pou nou m pale yo. Si nou vle m pale sou yon bagay espesyalman, mande m sa…si m kapab…m ap ban nou l.
  3. Fason m trete sijè yo rele m chè mèt chè metrès. Lalwa bouch mwen pa pou vann, se HT m te achte l. Ou kapab pa renmen sa m ekri, ou gen yon sèl bagay pou w fè nan ka sa a… kite yon komantè pou mwen souple.
Version originale : La loi de ma bouche n'est pas à vendre. Publié le 1er novembre 2017.

Kategori

Repons

Cet article est également disponible en : French

Leave a Reply

%d bloggers like this:
Skip to toolbar